|
ПО РАСПИШУВАЊЕ
НА КОНКУРСОТ ЗА РАЗВОЈ НА КУЛТУРАТА ПРЕКУ ТУРИЗМОТ
Беровци се тркаат за
дел од 5.000.000 долари од Светската банка
Во Берово веќе наголемо
се подготвуваат индивидуални и групни проекти со кои граѓаните
ќе конкурираат пред Министерството за култура. Граѓаните,
а посебно занаетчиите: копаничари, тишлери, мајсторите
Во Берово веќе наголемо се подготвуваат индивидуални
и групни проекти со кои граѓаните ќе конкурираат пред Министерството
за култура за дел од 5.000.000 долари што Светската банка
ги додели за развој на културниот туризам. Граѓаните, а посебно
занаетчиите: копаничари, тишлери, мајсторите за каци, но и
земјоделците и сточарите веќе формираат здруженија и изготвуваат
проекти со свои идеи за развој на занаетчиството и производството
на здрава храна во овој крај. По се изгледа дека трката за
добивање на дел од парите ќе биде голема, а секој занаетчија
се надева дека ќе добие барем нешто. Како што ни изјави Ѓорѓи
Поповски, копаничар од Берово, копаничарите и уметниците веќе
размислуваат и за отворање на некој галериски простор во кој
нивните дела ќе бидат изложени за продажба. Исто така ни рече
оти постои иницијатива нивните дела да се изложуваат и во
ресторанот кај езерото, но туристите ќе можат да ги посетуваат
и нивните работилници и да гледаат како се создава едно дело.
Од 5.000.000 долари за пилот-проектот за Берово следуваат
10 отсто или вкупно 500.000 долари. Нив ќе ги добиваат на
рати, по 100.000 долари годишно. Освен парите од Светската
банка, во Берово ќе финансира и Министерството за култура
и тоа со канцелариска опрема и материјали и компјутери.
Министерството за култура конкурсот го распиша пред неколку
месеци, а формирана е и Комисија која ќе ги разгледува предлозите
на граѓаните за пилот-проектот Берово. Досега во општината
во Берово се уште нема пристигнато конкретни предлози, но
како што вели портпаролот на Министерството за култура Оливер
Шамбески, добро е што веќе се пројавуваат иницијативи меѓу
граѓаните.
- Комисијата ќе ги разгледа сите предлози од граѓаните, без
разлика колку се тие банални и смешни. Меѓу предлозите сигурно
ќе има и добри што ќе може да влезат во конкретниот план за
развој на културниот туризам. Сега се уште сме кај првата
подготвителна фаза каде се прави анализа за потребите и потенцијалите
на Берово, а ја изготвуваме со странски консултанти и треба
да биде готова до крајот на годинава - вели Шамбески.
Берово како пилот-локалитет беше избран од Светската банка,
како најпогоден за спроведување на проектот "Развој на општините
преку културата" и тоа за оживување на манастирскиот туризам.
Министерството за култура дури и го предложи манастирот "Св.
Архангел" за развој на манастирскиот туризам. Како што вели
Шамбески, идејата е стара повеќе од десетина години, а за
неа Републичкиот завод за заштита на спомениците на културата
има изработено и проект. Освен во манастирскиот комплекс,
иницијативи за развој на туризмот има и на Беровското Езеро.
Таму веќе е реновиран постоечкиот ресторан и бунгаловите.
Во Берово има и иницијатива за отворање на туристичка агенција,
преку која граѓаните ќе ги нудат своите услуги, издавање соби
за туристи. (Е.О.С.)
|
